Charta Fondatrice

 

Prèambllo

Constatènt que dens un mouél de zones, o at gint èfôrt de recuely de donês concèrnant la g·eografia arpitana (ou francoprovençâla), et que dens les zones onte l’envèrso est cèrtin, celes donês sont sovent pou accèssibles u public.

Constatènt que cèta situacion mèna a un apourissement —vêr a una pèrda— du patrimouèno linguistico et culturèl, que yèlo tot-pariér mèna a una falyita de la prêsa de conscience de l’existence de l’Arpitania.

Concluènt que cetos fêts sont ren que regrètâblos.

Çu jôrn, lo 5 de juèn de 2013, nos dècrètons la fondacion de l’Ofiço G·eografico Arpitan.

Objèctivos

L’Ofiço G·eografico Arpitan est un’ associacion que mire a rassemblar et a rebalyér disponibles totes les donês de la g·eografia arpitana. De fêt, ela sè balye por mission de :

  • Rassemblar una bâse de donês sur les localitês arpitanes.
  • Constituar la lista de les comenes arpitanes, avouèc l’ètimologia, la prononciacion, et la grafizacion du nom de la comena.
  • Enquétar sur les divisions tèrritoriâles de l’Arpitania, historiques et actuèles.
  • Rebalyér u publico, par la publicacion surtot d’ovrâjos et de mapes, los divèrs rèsultâts de sos trâvalys.
  • Rengonfllar l’utilisacion de la toponimia arpitana par los actors publics.

Organizacion intèrna

Tota pèrsona ou organizacion que participe ux travalys de l’Ofiço G·eografico Arpitan serat considerâ come membro sur demanda, et avouèc l’acôrd des administrators.

Los dous fondators de l’Ofiço, Stoflo de Rôvela et Sandro Raymond, seront administrators pèr dèfaut. De novèles pèrsonas pôrront être dècllarês administrators sè :

  • lor candidatura est parrenâ par un administrator
  • lor candidatura est aprôvâ par une propocion de ⅔ des administrators

Si els le souhètont, los administrators pôrront nomar un prèsident, de vês u mitan d’èlos, et lui confiar des pôvers.

Vos povêd avouèc tèlèchargiér un fichiér (pdf) de la charta iquè : pdf